KALIBO, Aklan — Arestado ro sangka eaeaki matapos nga takawan ro daywang crew it sangka fast food sa ginpatigayon nga operasyon it kapulisan sa Brgy. Estancia, Kalibo.
Nakilaea ro suspek nga si Silvestre Basañes, alyas John, 47, ag residente it Lopez Jaena St., Jaro, Iloilo City.
Suno sa mga biktima nga sanday Kayne dela Cruz, 25, it Poblacion, New Washington ag Andrew Baldomero, 26, it Brgy. Biga-a, Malinao, parehong crew it fast food sa Mabini St., Kalibo nga gintinguhaan pa nanda nga maeagas ro suspek nga sa mayad nga swerte hay nakapangayo it bulig sa mga naga-roving nga kapulisan.
Nabawi halin sa suspek ro sling bag it mga biktima nga may sueod nga mga importanteng kagamitan ag kwarta nga kapin sa P1,500 ni Baldomero.
Nakilaea ro suspek pinaagi sa CCTV footage it nasambit nga establisimento nga natukiban nga nagsueod sa locker room it mga crew.
Kasong pagpanakaw ro ginpasaka kontra kana.
Sa dugang nga imbestigasyon, natukiban nga may standing warrant of arrest ro suspek sa kasong theft nga ginpaguwa ni Presiding Judge Alicia A. Cruz-Barrios it MCTC, Kalibo.
Natukiban nga ro suspek man ro responsabli sa mga panakawan nga nagakatabu sa mga ospital sa banwa it Kalibo.
Kapin sa P20,000 ro gintaeana nga piyansa it korte para sa anang temporaryong kahilwayan.
Ginkustodiya it Kalibo PNP ro suspek ag ginturn-over sa korte nga natungdan.
