KALIBO, Aklan — Ginsuhestiyon ni Aklan 1st District Congressman Carlito Marquez sa mga miyembro it Manaba nga Kapueongan it Kongreso nga imbestigahan ro natabu nga trahedya sa isla it Boracay nga ginkamatay it pitong paddlers it Dragon Force team.
Sa House Resolution No. 385 nga ginsumite ni Marquez sa Kamara, tuyo kara nga makaangkon it maid-id nga pag-usisa sa insidente kamana man nga mapaathag ro Philippine Dragon Boat Federation angot sa andang mga sueundanan sa oras nga may routine practice ro mga miyembro kara.
Nasayuran nga namatay ro mga paddlers matapos nga kumueob ro andang ginasakyan nga dragon boat matapos nga hampakon it mabaskog nga humbak samtang nga naga-training para kunta sa pagapasakupan nga international competition sa nasyong Taiwan.
Sa makaron hay nagapabilin nga suspindido ro mga dragon boat activities sa nasambit nga isla.
