KALIBO, Aklan — Ginatantiya nga P200,000 ro danyos it sunog nga umugdaw sa sangka boarding house sa kanto it Acevedo ag XIX Martyrs Sts. Kalibo, Biyernes it gabi-i.
Suno kay FO3 Joseph Dapetillo, arson investigator it Bureau of Fire Protection ukon BFP Kalibo nga nakabaton sanda it fire call bandang alas-10:30 it gabi-i rason nga insigidang nag-deploy it tatlong fire truck .
Ginpahayag dugang nga mabahoe eon ro kaeayo pag-abot nanda sa lugar bangud nga himo eamang sa light materials ro boarding house nga ginapanag-iyahan it mag-asawang Jose ag Luz Gonzales.
Eubusan sigon nanda nga na-control ro kaeayo bandang alas-10:50 ag gindeklara ro fire out bandang alas-11:10.
Owa eon sigon it may naga-istar nga boarders sa lugar kat matabu ro insidente rason nga owa eon man it supply it kuryente.
Apang may napan-uhan nga dating naga-istar sa lugar nga gina-alegar nga naghakot it iba pang gamit, kun sa siin, sambilog man sa andang paga-imbestigahan .
Sa makaron hay padayun pa nga ginatumod ro ginhalinan it sunog.
