KALIBO, Aklan — Dismayado nga nagdangop sa Kalibo Police Station ro sangka 23-anyos nga daeaga matapos gina-alegar nga biktima it mobile loan application nga nagtuga kana it kahuy-anan.
Suno kana, kumagat imaw sa tanyag it Fast Cash Finance nga makit-an sa mobile loan application sa haega nga P2,000 apang ro ana eamang nga nabaton hay P1,000.
Sa sueod sigon it 10 diyas hay kinahang-ean nga mabayaran ro nasambit nga kantidad sa mga gintaeana nga cash remittance center ag bangud sa may ginfil-apan nga kontrata hay gilayon sigon imaw nga nagbayad.
Nagaeaum imaw nga na-settle eon ro anang utang apang ko ulihi sigon hay ginapa-reloan raya it P5,000 ag ro mabaton eamang hay P3,000.
Bangud sa nataeopangdan nga mataas ro tubo hay uwa eon imaw it interest nga mag-reloan pa.
Bilang baeos it nasambit nga loan application hay ginpadaehan it text messages ro anang contact sa cellphone bangud nga gin-hack sigon ro anang system rason nga nakaangkon sanda it access sa anang pamilya ag iba pang mga kakilaea.
Ro nakabaehag suno kana sa message hay kinahang-ean imaw nga magbayad it kapin sa P5,000 bangud sa anang utang nga uwa na-settle.
Bangud kara, naalarma sigon imaw rason nga nagpabaehag sa taeatapan it pulisya ag ko ulihi nadiskubrehan nga bukon raya it rehistrado sa Securities and Exchange Commission (SEC).
Samtang, ginlaygayan nana ro publiko nga inde magpadaea-daea sa mga mobile loan application maskin anu pa kagipit bangud nga magatuga eamang raya it kahuy-anan kapareho kana nga nag-isip nga magpakamatay eon lang agud nga inde eon imaw paghingabuton.
