KALIBO, Aklan — Ginaduso it Aklan provincial board nga maimbestigahan ro security lapses it mga jail guards it Aklan Rehabilitation Center (ARC) matapos ro sunud-sunod nga pagtakas it mga preso.
Sa reklamong ginpaabot it Bombo Radyo kay Aklan 1st District Board Member Harry Sucgang, gintalakay it provincial board ro isyu ag gin-refer sa committee on peace and order nga ginapamunuan ni 1st District Board Member Nemesio Neron.
Naging sueod it komentaryo it Bombo Radyo si jail warden Pedrito Escarilla matapos nga medyu nagpatuman it news blackout sa natabu.
Tuyo kara nga matumod kun ham-an nga nakatakas ro mga preso ag makahimo it mga tikang agud nga indi eon mauman pa ro kapabayaan it mga jail guards nga nagabantay sa mga inmates nga nagatambong sa mga court hearing it andang kaso.
Nasayuran nga hasta sa makaron hay nagapadayun ro manhunt operation sa inmate nga si Igmedio ‘Butchoy’ Tropa, residente it Brgy. Agbalogo, Makato, Aklan nga nagapangatubang sa kasong double murder matapos mapaeagiwan ro jail escort ko nagtaliwan nga domingo sa Batangas port.
Magatambong kunta ro preso sa court hearing sa Manila.
Nauna kara, nakapaeagiw man ro sambilog pang inmate nga si JR Ruiz pinaagi sa pag-eumpat sa kongkretong pader sa nalikod nga parte it presuhan ko Setyembre 21 sa katung-anan it ginapatigayon nga religious activity.
Matapos ro sang domingo nga pag-usoy, nadakpan si Ruiz nga nagapangatubang sa kasong rape sa Brgy. Cabayugan, Malinao.
