KALIBO, Aklan — Patay ro sangka 31-anyos nga mangingisda kat magbigti gamit ro cable wire matapos nga layasan it misis tuga it andang pag-inaway sa Brgy. Dumaguit, New Washington, Lunes it aga-aga.
Patay eon kat madiskubre ro biktimang si Chris John Espineli, alyas Jan-Jan, residente it nasambit nga lugar it anang tiyo nga si Gerald Jizmundo bandang alas-3:00 it aga-aga sa sueod it andang baeay.
Sa imbestigasyon, nakaangkon it grabeng away ro biktima sa anang misis nga si Jonalyn bangud sa plano nga pagpa-ampon sa andang tatlong buean nga eapsag nga unga.
Gusto sigon it biktima nga sa anang manghod raya itao apang indi magpasugot ro anang asawa ag gusto nga daehon raya sa mga madre.
Raya hay nagresulta sa paglayas it misis ag gin-aywan ro mister sa andang baeay.
Nasayuran nga pirmeng nagahana nga magpakamatay ro mister kon mahilong, kun sa siin, raya man ro kaeabanan nga gina-awayan it mag-asawa.
Nagapati ro pamilya it biktima nga owa it foul play sa insidente.
