KALIBO, Aklan — Patay ro backrider samtang naninahan ro driver matapos nga banggaan ro andang ginasakyan nga motorsiklo it sangka pick-up sa national highway nga sakop it Brgy. Cabangila, Altavas, Lunes it agahon.
Namatay si Jesus Paderes, 29, bangud sa pagkabagok it ueo samtang naninahan ro driver nga si Jeffrey Villanueva, 48, nga nag-angkon it kahalitan sa nagkaeain-eain nga parte it eawas , parehong residente it Proper 2 sa nasambit nga barangay.
Ro daywa hay insigidang gindaea sa Altavas District Hospital, apang ro angkas hay namatay samtang ginabueong.
Base sa report, bandang alas-9:00 it agahon ko Lunes, magka-angkas ro daywang biktima sa sangka motorsiklo nga ginamaneho ni Villanueva paagto sa direksyon it Iloilo kat gulpi nga inagaw it pick-up nga saeakyan ro andang linya rason nga natabu ro banggaan.
Ginkilaea it pulisya ro driver it Ford Ranger nga si Joel Ofianga, 47, residente it Zone 5, Sitio Bolabog, Brgy. Balabag sa isla.
Bangud sa kabaskog it impact, inapok it pilang metro ro mga biktima halin sa andang motorsiklo.
Ginasugid nga halin sa Iloilo ro pick-up ag nagapa-agto eon kunta sa banwa it Kalibo kat gina-alegar nga nakatueugan samtang nga nagamaneho it anang saeakyan.
Boluntaryo man nga nagsurender si Ofianga ag nagpromisa nga magabulig sa pinansiyal nga kinahangeanon it mga biktima.
