KALIBO, Aklan — Plano makaron it market master it Kalibo public market nga isuhestiyon kay Mayor Emerson Lachica nga magtukod it task force para sa madasig nga paglimpyo it tindahan nga makaron hay ginareklamo nga mabaho .
Suno kay Market Master Abel Policarpio nga tuyo kara nga makaangkon it partisipasyon ro mga natungdan nga taeatapan it LGU-Kalibo ag mga vendors agud nga madasig nga mahimos ro mga basura ag debris halin sa sunog.
Ginpahayag dugang nga limitado eamang ro andang mga tawuhan rason nga indi ora-mismo nga mahimos ro mga nagkasunog nga mga baligya nga nagatuga makaron it baho eabi eon ro mga panakot ag mga tinuean-on nga nagaka-eunot eon kamana man ro mga naka-stock nga karne it mga restaurants.
Mag-eowas kara, gabi-i eamang sanda pwedeng nga makalimpyo bangud sa operasyon sa sueod it tindahan .
Kaabuan sigon sa mga vendors nga naapektuhan it sunog ko nagtaliwan nga Setyembre 15 hay mga mapuslan eamang mga items ro ginpanghimos ag gin-aywan ro mga indi eon magamit.
Ginakabaeak-an man nanda makaron ro pag-abu it eangaw sa lugar nga maka-apekto man sa mga nagabaligya ag mga bumaeakae.
Sa pihak nga parte, iga-rekomenda man sigon nana ro pag-activate sa satellite market sa Oyo Torong Kalibo agud nga magamit it mga meat vendors sa daeanon it Oyo Torong kamana man it mga naapektuhang vendors it Kalibo public market.
