KALIBO, Aklan — Ginkumpirma ni Police Corporal Jane Vega, tagapaghambae it Aklan Police Provincial Office (APPO) nga mismong si Deputy Regional Director for Administration nga si Police Colonel Remos Zacarias Cañeso ro nakadakop sa ap-at ka miyembro it Malay Police Station nga naka-assign sa isla it Boracay nga nagagamit it cellphone samtang on-duty.
Apang, uwa ginhambae kon nagahampang gidman ro mga raya it “mobile legends” kaparehas sa nagguwang balita.
Suno kay P/Corporal Vega, hugot nga ginadumilian sa mga pnp personnel ro paggamit it cellphone samtang una sa trabaho partikular kon naka-assigan sa mga matawong lugar.
Sambilog suno kana nga ginalikawan kara hay basi may mag-eontad nga krimen ag uwa ro focus sa ginabantayan nga lugar kon sa siin, indi eagi marespondehan ro insidente.
Natabuan sigon nga ro deputy regional director for administration mismo ro nakaakto sa ap-at ka mga pulis rason nga gilayon sanda nga ginpareport sa regional office.
Katuyuan sigon kara nga mataw-an sanda it leksyon ag sambilog eon kara ro pagpahimo kanda it nagkaeain-eain nga klase it exercises.
Ro ap-at ka mga pulis hay ginakaeakipan it tatlong ka patrolman ag sangka patrolwoman.
Sa pihak nga parte, ginmanduan it PRO-6 si Provincial Director Police Colonel Esmeraldo Osia Jr. nga imbestigahan ro natungdan ka mga pulis ag kon mapamatud-an nga nag-eabag ro mga raya sa protocol hay posibleng magapangatubang sanda it nagakaigong sanctions.
