KALIBO, Aklan—May panibag-ong kaso it coronavirus disease 2019 nga naidugang sa probinsiya it Aklan.
Raya hay base sa COVID-19 Bulletin it Department of Health Region 6.
Suno kay Dr. Cornelio Cuatchon Jr. it Provincial Health Office ukon PHO Aklan nga ro 29-anyos nga pasyente nga sangka eaeaki nga nag-positibo sa sakit hay naghalin sa Quezon City ag nag-uli sa banwa it Malinao ko Hulyo 22 kaibahan ro iba pang miyembro it anang pamilya sakay it sangka barko.
Matapos sigon nga madaea sanda sa ligtas covid center hay ginpaidaeum sa profiling ag rapid anti body test kamana man nga ginmanduan nga magpatigayon it strict home quarantine.
Pagkamasunod nga adlaw hay ginboe-an eon man sanda it swab specimen sample ag dikara nakumpirma nga positibo sa covid ro nasambit nga pasyente sa ginpaguwa nga resulta kahapon halin sa Western Visayas Medical Center sa Mandurriao, Iloilo.
Sa mayad nga swerte ro 4 nga iba pang miyembro it anang pamilya hay nagnegatibo sa sakit.
Gindugang pa ni Dr. Cuatchon nga ro pasyente hay asymptomatic ag ginsaylo eon sa quarantine facility sa Aklan training center.
Kapin sa 15 nga katawo nga puro taga Malinao nga nakaangkon it direct contact sa pasyente ro ginboe-an man it swab sample ag pila sa mga raya hay pending pa ro andang resulta.
Samtang, 45 pa sigon ro andang ginahueat nga confirmatory result halin sa probinsiya it Aklan kaibahan ro mga katapo it Philippine Coast Guard ukon PCG Aklan nga nakabase sa Caticlan Jetty Port.
