Kalibo Aklan ——–Sangka eaeaki sa Australia nga naduea-an it wallet matapos ro sangka New Year’s Eve Party nga ginpatigayon sa beach ro uman nga nakit-an matapos ro 25 anyos .
Suno kay Joseph Bewes, nagatikang imaw sa beach ko nagtaliwan nga domingo sa Lennox Head, New South Wales kat makit-an nana ro sangka lumang wallet nga medyu nagkupas eon it husto bangud sa kabuhay it pagkabuead kara sa guwa.
May sueod pa raya nga $5 dollars ag pilang expired nga credit cards.
Ginpost ni Bewes sa sangka lokal nga grupo sa Facebook ro anang nakit-an kaibahan eon ro pangaean it posibleng nagapanag-iya it wallet nga si Paul G. Davis base sa mga credit card nga sueod kara .
Nakita ni Jodie Davis ro post ag insigida nana raya nga ginpahisayod sa igkampod it anang asawa nga si Paul Davis.
Insigidang nadumduman ni Davis ro wallet nga naduea nana may 25 anyos eon ro nagtaliwan rason nga eubus ro anang pagkakibot kat maibalik pa raya kana.
Nagkita si Bewes ag Davis, nga nagdaea it six-pack nga beer bilang pagpasaeamat sa naka-usoy it anang mabuhay eon nga naduea nga wallet.
