KALIBO, Aklan—Nagtaeana it mga “paid parking zones” ro Transport and Traffic Management Division sa banwa it Kalibo.
Suno kay Kalibo mayor Emerson Lachica nga tuyo kara nga malikawan ro eapnaag nga pagparada it mga saeakyan sa mga nagapangunang karsadahon.
Natukiban sigon nanda sa mga ginpatigayon nga road clearing operations nga ro mga illegal parking ro nagiging rason it pag-gutok it mga daeanon ag pag-grabe it daeagan it trapiko.
Hugut suno kana nga pagabantayan it mga kapulisan ag KAP members ro mga lugar nga gintumod nga paid parking kapareho it Martelino St. sa likod it grandstand it Kalibo Pastrana Park; portion it Dr. Gonzales St partikular sa tunga it Oyo torong ag C. Laserna St., ;portion it C. Laserna St. sa likod it Aklan College sa tunga Regalado ag Archbishop Reyes St; portion it Pastrana St. halin sa F. Quimpo st paagto sa M. Laserna St; portion it Acevedo St. halin sa 19 Martyrs paagto sa Roxas Avenue; ag portion it Veterans Avenue halin sa Archbishop Reyes St. paagto sa 19 Martyrs; kamana man sa portion it 19 Martyrs st halin sa Toting Reyes St. paagto sa Mabini St.
Samtang, ro panueoktan sa paid parking hay sa mga oras it alas-7:00 it agahon hasta it alas-4:00 it hapon ag para sa overnight parking hay alas-9:00 it gabi-e hasta it alas-5:00 it agahon adlaw-adlaw.
Ro nasambit nga tikang sigon hay mapahagan-hagan ro mga illegal parking kamana man agud nga mahawanan ro mga karsadahon.
