Kalibo Aklan ——–Apektado makaron ro ginahimo nga pagrepair it Department of Public Works and Highways (DPWH) sa mga karsadahon nga sakop it Eastern side it probinsya it Aklan.
Raya hay kasunod it sigidas nga pagbubu it uean ko mga nagtaliwan nga adlaw daea it na-experiensyahan nga Low Pressure Area (LPA) kung siin nagtuga pa it pilang pagbaha sa pilang kabanwahanan it probinsya.
Suno kay Engr. Leo Bionat, Assistant District Engineer it DPWH-Aklan nga worst enemy it andang ginabutang nga aspalto ro tubi ukon uean.
Suno kana, naapektuhan man ro trabaho it andang maintenance team nga naga-kumpuni it mga potholes.
Owa pa sigon natapos ro andang road repair sa parte it banwang Batan paadto it Altavas.
Nagaeaum man imaw nga makaangkon eon it manami nga tyempo para mataw-an sanda it kahigayunan nga matapos ro proyekto.
Haeos 70 porsyento eon man sigon ro andang naayos ag pagatinguhaan pa nandang matapos eon raya sa mas madali nga panyempo.
