OLYMPIC UPDATE —- Magakinahangean eamang it daywang daog ro nagapangunang pambato it nasyon sa boxing nga si Eumir Marcial ag makabo-oe eon imaw it Olympic medal.
Raya hay matapos nga makabo-oe it slot sa round of 16 sa Tokyo Olympics boxing competitions nga umarangkada eon makaron nga adlaw it Sabado, Hulyo 24.
Si Marcial nga silver medalist sa 2019 World Boxing Championships hay indi eon kinahangean nga mag agi sa round of 32 bangud sa top 4 Olympic ranking halin sa AIBA ukon International Boxing Association.
Ro 26-anyos nga si Marcial hay ranked No. 3 sa 20 nga mga entries sa men’s middleweight division.
Nagpaidaeum imaw sa maid-id nga training sa United States Olympic Boxing Training Center sa Colorado Springs antes nga nagbiyahe paagto sa Tokyo kaibahan ro national coach nga si Ronald Chavez.
Kaibahan si Marcial sa mga ginapanan-aw nga magadaog sa 75kg division kaibahan sanday Ukrainian Oleksandr Khyzhniak ag Russian Gleb Bakshi nga nauna eon nga nagpierde kana.
Base sa Olympic boxing schedule, makita sa aksyon si Marcial sa middleweight round of 16 sa Hulyo 28.
Ro iba pang Filipino boxers nga magasabak sa quadrennial games hay sanday featherweight Nesthy Petecio ag flyweights Carlo Paalam ag Irish Magno.
