KALIBO, Aklan—Mabahoe ro kumpiyansa ni Kalibo Executive Assistant to the Mayor Basil Tabernilla nga sarang pyerdihon ni eight division world champion Manny Pacquiao ro reigning WBA welterweight champion nga si Yordenis Ugas sa andang pagsambuwa hin-aga, Agosto 22.
Nagapati sigon imaw sa abilidad ag kapasidad ni Pacquiao bangud mabuhay eon raya nga boksingero kamana man nga maabo eon ro naging eksperyensya.
Apang, dapat man sigon nga dahanan it fighting senator ro anang pangaeanan eabi pa ag ginakabig eon raya bilang future hall of famer sa patag it boxing.
Matueopangdan nga sa pihak it edad nga 42 nagapabilin pa gihapon ro kadasig ni Pacman sa ibabaw it ring.
Samtang, sa ginpatigayun nga weigh-in kaina, nagtimbang si Pacquiao it 146 pounds samtang 147 pounds si Ugas.
Madumduman nga ro Cuban boxer ro ginbaylo kay Errol Spense Jr. nga nakataeana kunta nga makasambuwa ni Pacman matapos nga makaangkon raya it eye injury.
Sa makaron, gigil ro Pinoy ring icon nga mabawi ro korona nga dapat kunta hay para kana matapos nga owa kara madepensahan ro WBA super champion it masobra sang dag-on.
Ro pag-engkwentro sa tunga nanday Paquiao ag Ugas hay pagahiwaton sa T-Mobile Arena sa Las Vegas, Nevada.
