KALIBO, Aklan—Ro Breast Cancer Awareness hay sangka kampaniya nga nagatuyong makapaabot sa publiko it insakto nga impormasyon kung paalin nga malikawan ro breast cancer.
Raya ro nagasimbolo it pink ribbon nga ro boot hambaeon hay pagkilaea ag pagtao it suporta sa tanan nga breast cancer survivors.
Raya man hay ginaselebrar kada buean it Oktubre sa bilog nga kalibutan.
Suno kay Dr. Mark Anthony Agana nga ro breast cancer hay kilaea bilang sambilog sa mga nagapangunang makamaeatay nga sakit sa mga kababayihan.
Agud nga malikawan ro pagkaangkon it breast cancer, hara ro mga tips nga dapat nga ubrahon.
I-monitor ro kilo ukon bug-at it eawas.
Ro pagkaangkon it maayos nga pang-eawason hay sangka pinakaimportanteng bagay.
Raya hay masayuran depende sa imong ginakaon.
Kung ikaw hay overweight, mas madasig kang maeapitan it sakit mas kapin eun ro cancer.
Ugalion nga magkaon it healthy food, ag i-monitor permi ro kilo.
Magkaon it masustansiya nga pagkaon.
Sanayon ro kaugalingon nga kumaon it prutas ag tinu-ea.
Healthy living dapat ro unang isipon para permi kang may gana ag energy sa adlaw-adlaw.
Pila sa tinuea ag prutas nga “anti-cancer” hay ro euy-ang dueaw, broccoli, lentils, kamatis, beans, berries, ag mga madahon ag mag-ehersisyo.
Raya hay ginarekomenda sa mga babaye ugud malikawan ro breast cancer.
Siguraduhon nga maka-ehersisyo it 30 minutes hasta 1 oras sa sang adlaw.
Kung ikaw hay napagpahueas, mas naga-ugan ro imong pamatyag ag nagaguwa ro toxins sa kaeawasan.
Ro mga physical activity kapareho it pagtikang , pagdaeagan, pag-adto sa gym ag pag-zumba hay mayad sa kaeawasan.
Likawan ro paggamit it birth control pills.
Ro mga babayeng permi nga nagagamit it birth control pills hay eapiton it breast cancer.
Kung naging pabaya sa pag-inom it nasambitang pills, raya hay magaresulta it heart attack ukon stroke.
Perming magpakonsulta sa doctor kung ikaw hay nagaplanong mag-inom it pills.
Mabahoe man ro maibulig it breast-feeding.
Maeayo ro tiyansa nga ikaw hay magkaangkon it breast cancer kung ikaw hay nagapa-breast feed.
Kung mas mabuhay kang nagapa-breast feed hay mas mabahoe man ro tiyansa it protective effect kara.
Regular nga magpakonsulta sa doktor.
Ugalion nga mag-adto sa imong doctor ag magkonsulta kung ikaw hay may nabatayagan nga kakaiba sa imong kaeawasan mas kapin sa imong dughan.
Indi pagbalewalaon maskin simpleng sakit eang agud makasigurado.
