KALIBO, Aklan—Uman nga nagresume ro overseas special recruitment activity it Philippine Overseas Employment Administration sa mga Licensed Recruitment Agency maghalin sa Manila.
Bangud kara, nagabatun man ro Public Employment Service Office (PESO) Aklan it mga aplikante para sa mga bakanteng posisyon sa ibang nasyon.
Suno kay Ms. Vivian Ruiz Solano it PESO-Aklan nga ro mga gustong makahabol hay puwedi pa sa gihapon nga magpasa it andang aplikasyon bangud ro interview hay nakataeana eun hin-aga nga adlaw.
Nasayuran nga ro mga bakanteng trabaho sa nasyon nga Japan hay ro Auto Mechanic, Carpenter, Fish Slicer, Frame Worker, High Speed Sewer, Marine Heated Fishery Processed Foodstuff (Daing Making), Spray Painter, Weaving Operator ag Welder.
Samtang sa nasyon man nga Poland hay Blaster Painter, Metal Fitter ag Welder.
Ro mga requirement hay ro mga masunod; Application Form nga idto mismo sa opisina it Aklan PESO, Birth Certificate ag Certificate of Employment.
Dapat nga ro aplikante hay naga-edad 20 hasta 30 anyos ag may unang an-om hasta sa sang dag-on nga work experience sa ginasudlan nga trabaho ag haom nga magpaidaeum sa tatlong buean nga Japanese Language Training.
Ro tanan nga mga intresado hay gina-enggayo man nga magpasa it andang application letter sa opisina it Aklan Prov’l. PESO.
