KALIBO, Aklan—Nakalista ro gobyerno probinsyal it masobra 500 nga “walk in” vaccinee sa unang adlaw it implementasyon kara ko Nobyembre 2 para sa mga pumueoyo nga gustong magpabgakuna kontra COVID-19 sa ABL Sports and Cultural Complex.
Suno kay J-Lorenz Dionisio, nurse it Provincial Health Office (PHO)-Aklan nga bukas raya sa mga pumueoyo nga naga-edad 18-anyos pataas kamana man nga owa it limitasyon.
Bukas sigon raya sa tanan nga kategorya kung siin kinahang-ean eamang nga magdaea it anumang valid ID, ballpen, face mask ag face shield it mga gustong magpabakuna.
Ro provincial vaccination area hay bukas halin Lunes hasta it Biyernes, umpisa alas-8:00 it agahon hasta alas-3:00 it hapon.
Dugang pa ni Dionisio nga bastante ro andang suplay rason nga owa it dapat ikabaeaka ro pumueoyo bangud tanan sanda hay makabaton it 2nd dose.
Sa makaron, Sputnik V nga himo it Russia ro ginagamit sa nagapadayun nga vaccination program it gobyerno probinsyal.
Ginpaathag man kara nga ginataw-an eamang sanda it Department of Health (DOH) it an-om hasta napueo nga adlaw para maubos ro mga bakuna.
Raya hay kasunod eon man it sunod-sunod nga pag-aeabutan it mga suplay it bakuna sa nasyon.
