KALIBO, Aklan—Hugot nga ginapanindugan it barangay council sa Barangay Libang, Makato nga ro bag-ong tapos eamang nga proyektong covered court sa andang barangay hay maghalin sa pundo nga gindonar it Magdalo Partylist pamaagi sa Department of Public Works and Highways ukon DPWH.
Raya hay matapos nga naging kontrobersiyal ro nasambitan nga proyekto bangud sa daywang beses raya nga gin-inagurahan.
Suno kay Barangay Kapitan Maria Victoria Nagamos Tagala it nasambitang lugar nga naunang nagpatigayon it pag turn-over si Aklan 2nd district congressman Teodorico Haresco kaibahan si Mayor Abencio Torres.
Pagkatapos kara hay pormal man nga gin-inagurahan ni Magdalo partylist representative Gary Alejano ro nasambitan nga proyekto.
Bangud kara hay may pilang ka mga pagkuwestiyon nga nabatun ro lokal nga gobyerno.
Apang sa kampo ni Kapitan Tagala hay klaro sigon nga proyekto raya it Magdalo partylist nga ginpunduhan it kapin sa 3 million pesos.
Ginsaysay pa kara nga may pilang dinag-on eun ro nagtaliwan samtang imaw hay sangka barangay kagawad pa eamang ag ro barangay kapitan pa katong tiyempo hay si Nolly Taborda, nagpasa sanda it sangka resolusyon nga nagatuyong magpangayo it pundo para sa gina handom it mga pomoeuyo nga covered court.
Napadali eamang sigon ro andang pagyabe sa proyekto bangud nga may andang kakilaea nga maeapit sa magdalo partylist.
Kat natapos eun ro proyekto hay nakibot eamang sanda kat nagpahayag ro staff ni Cong. Haresco nga anda rayang iga-turn over sa barangay apang owa man it may ginapakitang mga papeles.
Pagkataliwan it pilang adlaw hay personal man nga nagpadueong sa nasambitan nga lugar ro representante it Magdalo partylist para man sa inagurasyon.
Nangud kara hay paealigban pa sa publiko kung siin gidman ayhan maghalin ro proyekto.
Sa pihak kara, gusto eamang sigon ni Kapitana nga klaruhon ro tanan ag eubos man ro anang pagpasaeamat nga mapuslan eun it mga pomoeuyo ro nasambitan nga proyekto
