KALIBO, Aklan—Nag-apela it pinansiyal nga bulig ro padre de pamilya agud nga mapa-eubong ro anang misis ag mapaguwa sa ospital ro anang bag-ong tawo nga eapsag nga presenteng naka-confine sa sangka pribadong ospital sa banwa it Kalibo.
Ginpaagi ni Ronnie Katimpo it Barangay Loctuga, Libacao sa Bombo Radyo Kalibo ro anang panawagan sa mga kaigbataan ag mga tawo nga may mabinueawanon nga tagipusuon agud nga mabuligan imaw sa sobra kataas nga hospital bill nanda nga nag-abot eon sa haeos tunga sa milyong piso.
Ginsaysay kara nga ko Disyembre 29, 2021 hay gindaea ro anang misis nga si Eunice Katimpo, 29 anyos sa ospital matapos nga ginsaeapuan sa anang gina-nabdos nga waeong buean pa eamang.
Bangud nga punuan ro intensive care unit ukon ICU it aklan provincial hospital rason nga gin-admit imaw sa St. Gabriel Hospital.
Bangud sa grabeng kundisyon it anang pag-unga pinaagi sa caesarean section rason nga gin-ICU, apang ko enero 2 hay binawian imaw it kabuhi.
Naka-eowas ro anang eapsag nga babaye ag haeos sang domingo man nga ginbutang sa incubator.
Naga-abot suno kana sa 335,650 pesos ro hospital bill it anang misis samtang 130,000 pesos sa anang eapsag ukon may kabilugan nga 465,650 pesos.
Gin-abisuhan sigon sanda it ospital nga indi nanda mabo-oe ro death certificate it anang misis hasta nga indi ma-fully paid ro andang hospital bill.
Nakapangayo eon sigon sanda it bulig sa natungdan nga ahensiya it gobyerno ag iba pang mga opisyal, apang kueang sa gihapon rason nga maskin sangkiri nga kantidad suno kana hay mabahoe eon nga bulig sa andang ginapangatubang nga kalisod.
Ro mag-asawa hay may ap-at nga unga ag ro anang panganay hay naga-edad pa eamang it 12-anyos.
