KALIBO, Aklan—Gin-aku it Munipal Economic and Enterprise Development Office (MEEDO)-Kalibo nga naging mabahoe nga hangkat kanda ro pagpatigayun it mga virtual event sa tunga it COVID-19 pandemic.
Suno kay MEEDO-Kalibo Head Mary Gay Quimpo-Joel, hugut nandang gin-obserba ro pagpatuman it health and safety protocol sa tanan nga event angot sa selebrasyon it 2022 Kalibo Sr. Sto. Niño Ati-atihan Festival.
Pila sa mga ginpreparar nga paindis-indis it MEEDO hay ro PATIK BATTLE of the ATI ATIHAN BANDS, Miss Kalibo Ati-atihan 2022, Ati-atihan costume ag maabu nga iba pa.
Nagtaeana ro lokal nga gobyerno it kapin sa P1.5 million nga pondo para sa natungdan nga mga event.
Aminado si Joel nga masyadong maisot ro nasambit nga kantidad kung igakumpara sa mga nagtaliwan nga Ati-atihan kat owa pa it pandemya.
Apang, nahimo man sigon nanda nga mapa-igu raya sa tanan nga aktibidad para sa week-long celebration it Ati-atihan Festival.
Sa pihak nga parte, sambilog ro MEEDO sa mga departamento nga grabeng naapektuhan ro income kasunod it pagpanaeasa it pandemya.
Mag-eowas sa nakansela nga Ati-atihan food festival ag bazaar, may pila pang payment halin sa income generating activities it ahensya ro nakaangkon it delay bangud sa kawad-an it kita it mga negosyante.
