KALIBO, Aklan—Nagapabilin nga hangkat sa gobyerno ro hugut nga pagpasunod sa publiko it health and safety protocols kaibahan eon ro pag-obliga kanda nga magpakuna, maskin nga haeos maga-daywang dag-on eon ro pakikipagsukoe sa COVID-19.
Ginhalimbawa ni Ramel Buncalan, board of directors it Philippine Chamber of Commerce and Industry ukon PCCI-Aklan ro mahina nga enforcement it mga ginapaguwa nga executive order ni Aklan Governor Florencio Miraflores nga nagatuyo nga matapna ro pagkalhit it deadly virus.
Suno kana nga raya ro mga kabangdanan kon ham-an nga nagabalik-balik ro mga prohibitions ag mga protocols rason nga atras-abante man ro pagsueong it ekonomiya.
Ginpahayag dugang nga ro pag-balanse sa nagahina nga ekonomiya ag paeag sa ikamayad nga eawas hay nagapabilin nga challenge para sa gobyerno.
Nasayuran nga base sa bag-ong direktiba it gobernador, obligado ro tanan nga mga unvaccinated employees nga magsumite it RT PCR test kada daywang domingo agud nga makasueod sa trabaho.
Gindugang pa ni Buncalan nga sa umpisa pa eamang hay suportado nanda ro vaccination program it gobyerno rason nga haeos tanan nga mga empleyado sa aklan, halin sa gobyerno ag pribadong sektor hay bakunado eon.
Apang may pila sigon nga kontra sa bakuna ag owa nagapati sa COVID 19.
Bangud kara, ginsuhestiyon nana nga pabaskugon pa ro information drive angot sa bakuna kamana man ro booster shots kontra sa deadly virus.
