KALIBO, Aklan—Nakataeana nga magpatuman it closure sa pagpagguwa it tubi ro National Irrigation Administration (NIA)-Aklan sa Pebrero 28.
Suno kay Gina Abello-Diongson, Presidente it ALFIA nga mabuhay eon raya nga gin-istoryahan kaibahan ro iba pang irrigators association.
Tuyo sigon kara nga mataw-an it kahigayunan ro iba pang proyekto nga iga-implementar it NIA.
Dugang pa kara nga kaeabanan sa mga mangunguma hay nagapatigayun eon it harvest rason nga owa eon haeos it nagakinahang-ean it maabu nga patubi sa mga kaeanasan.
Sa oras sigon nga maging bastante ro tubi sa Aklan river ag matapos eon ro ibang proyekto angot sa main canal hay posibleng uman eon nga makapagguwa it tubi sa buean it Mayo.
Gin-engganyo man kara ro mga mangunguma nga magpasakop sa sa mga irrigators association para masayuran ro nagkaeain-eain nga benepisyo nga ginatanyag it gobyerno.
Sa pihak nga parte, nagapati si Diongson nga mabahoe nga bulig para sa mga lokal nga mangunguma ro ginpatindog nga Aklan Grains Processing Center sa bahin it Brgy. Nalook, Kalibo.
Sa raya sigon nga pamaagi hay mas mataw-an it tyansa ro mga mangunguma nga makapili kung siin igabagsak ro andang gina-ani nga paeay.
May manami sigon raya nga epekto bangud gina-promote kara ro locally-produced nga paeay kamana man nga makaangkon it kompetisyon sa tunga it mga traders.
Ro Aklan Grains Processing Center hay may kaugalingon nga drying ag milling area nga kaparte it mabahoe nga proyekto it Provincial Government angot sa Agri-Aqua farm.
