KALIBO, Aklan—Mabahoe ro pagpati ni Barangay Kagawad Emily Rentino it Barangay Cupang, Banga nga may paadtunan gid nga manami nga resulta ro andang pagbaka-baka para sa andang barangay agud nga maangkon ro hustisya angot sa gin-alegar nga personal nga paggamit nanday Kapitan Riza Relojo ag barangay treasurer Lourdes Zambrona it kapin sa P939,000 nga pundo it nasambitan nga barangay.
Suno kay Kagawad Rentino nga ginpaabot eun nanda ro andang mga natipon nga dokumento sa taeatapan it Municipal Local Government Operations Office ukon MLGOO.
Nagpahayag man sigon ro MLGOO nga sanda eun ro maga-forward it nasambitan nga dokumento sa opisina it provicial director.
Dugang pa ni Kagawad Rentino nga kaabuan eun sa mga pomoeuyo hay nagahueat it resulta it nasambitan nga reklamo ag uhaw eun sa hustisya bangud gusto it mga raya nga mapahalin sa anang puwesto si Kapitan Relojo.
Madumduman nga gin-ako mismo ni Kapitan Relojo sa Bombo Radyo nga nagamit nanda it anang Barangay Treasurer nga si Zambrona ro pundo it barangay ag nagpromisa nga ibalik ro lugar it kwarta nga anang nabo-oe.
Sa pihak nga parte, nagabantay man makarun ro mga pomoeuyo sa Barangay Cupang, Banga kung san-o matapos ro isyu nga ginakaeakutan ni Brgy. Kapitan Riza Relojo ag kung san-o pa maibalik ro andang naduea nga pundo.
Suno kay Ms. Geline Resico, sangka residente it Barangay Cupang, Banga nga sa makarun hay apektado ro budget it mga Person with Disabilities ukon PWD’s ag senior citizen.
Bangud kara hay nagakadapat eamang nga maibalik ro pundo agud maipanudpod man sa nagakaigo nga benipisyaryo.
