BALITANG Espesyal —- Indi makapati ro mag-asawa halin sa Nova Scotia, Canada kat mataeupangdan nanda nga ro sambilo sa mga tiyo nga gin-unga it andang ayam nga bulldog hay kulay berde ukon green .
Suno sa mag-asawang Trevor ag Audra Mosher, pinaka-ulihi nga gin-unga it andang bulldog nga si Freya ro kulay berdeng puppy.
Sa pageaum nga namueaw-mueawan eamang, insigida nanda nga ginlimpyuhan ro tiyo apang mas pang nagkutom ro pagiging kulay berde kara .
Sa pagkabaeaka nga may sakit ro tiyo, nag-search sanda sa Google gamit ro mga kataga nga “my puppy is green, what’s wrong?”
Sa bulig it internet, nasayuran it mag-asawang Mosher nga sangka tumaeagsahon nga hitabu nga maging kulay berde ro sangka bag-ong ungag a tiyo ag owa it ginatuga raya nga peligro sa anang ikamayad nga eawas .
Suno sa mga beterinaryo, ro nasambit nga rare discoloration hay nagakatabu kon na-expose ro tiyo sa green pigments it apdo it andang ina samtang sa tiyan pa eamang .
Bukon it pangmabuhayan ro pagiging berde it tiyo bangud nga magakupas man ro kulay kara samtang nga nagabahoe .
Bangud sa kakaiba kara nga kulay, ginapili-an it mag-asawang Mosher ro mga pangaean nga Pistachio, Wasabi, Hulkette ag Lucky Irish.
