KALIBO, Aklan—Umarangkada sa ika-ap-at nga kahigayunan sa probinsiya it Aklan ro “Bayanihan, Bakunahan” kahapon nga adlaw it Huwebes, Marso 10 hasta Marso 11, kun sa siin target nga mabakunahan ro dugang nga mga senior citizens, owa nakapa-2nd dose ag nakabaton it booster shots.
Raya ro ginpahayag ni Dr. Cornelio Cuatchon Jr. it Provincial Health Office ukon PHO-Aklan.
Gindugang pa ni Dr. Cuatchon nga bukas man ro andang vaccination site sa Aklan Catholic College gym sa mga owa pa nakabaton it bakuna kontra COVID 19.
Mataas pa sigon ro numero it mga senior citizens nga owa pa nakapa-booster shots.
Sa pihak nga parte, haeos 10% pa eamang ukon 48,945 sa kabilugan nga masobra sa 300,000 nga fully vaccinated individual sa aklan ro nagpa-booster shots.
Pwede suno kana ro walk-in sa mga gustong magpa-booster shots basta nga tatlong buean ukon masobra pa ro nagtaliwan halin sa 2nd dose.
Importante sigon ro booster dose agud nga makaangkon it dugang nga proteksyon sa anuman nga variant it deadly virus.
Ginpahayag dugang nga pagapabaskugon man nanda ro pagbakuna sa nabilin nga 12 hasta 17 anyos sa daywang adlaw nga National Vaccination Days.
Samtang, haeos 75% eon it target population sa Aklan ro fully vaccinated.
