KALIBO, Aklan—Nagaeaum makaron ro mga van operators and drivers nga mataw-an sanda insigida it subsidiya it gobyerno.
Raya hay kasunod eon man sa hana nga pagsirit it produktong petrolyo hin-aga nga adlaw it Martes.
Suno sa driver nga si Bong, alas-3:30 pa it aga-aga sanda nagguwa apang hasta it alas-5:00 hay uwa gihapon sanda nakahalin sa pila apisar nga adlaw it Lunes haeos tanan hay nagabalik sa trabaho partikular sa isla it Boracay.
Apang, sa makaron sigon hay uwa gid sanda it mabueo nga pasahero.
Ginpahayag dugang nga kon ordinaryong adlaw hay madasig nga mapuno ro mga behikulo apang sa makaron sigon hay makit-an ag mabatyagan ro paghina it andang pagbyahe.
Raya hay maskin nga ginpaidaeom eon man sa alert level 1 status ro bilog nga probinsya it Aklan.
Gin-insister kara nga kinahang-ean man nanda nga makaangkon it kita sa pang-adlaw adlaw rason nga kinahang-ean nga makabaton man sanda it subsidiya bangud nga uwa gihapon ginapasugtan it Land Transportation and Franchising Regulatory Board ukon LTFRB ro pagpataas it pamasahe sa pihak it nagapadayon nga pagtinaas it presyo it produktong petrolyo.
