KALIBO, Aklan—Bukon it bastante ro P200 nga financial aid nga planong itao it gobyerno sa mga pigadong Filipino sa tunga it sunod-sunod nga pagtaas it presyo it produktong petrolyo.
Raya ro ginpahayag ni Senator Francis “Kiko”Pangilinan sa ginhiwat nga Vice Presidential debate nga gin-organisa it Commission on Elections (Comelec) sa Sofitel Harbor Garden tent kabi-i, Marso 20.
Suno sa mamalidha, kueang ro nasambit nga kantidad para pun-an ro kinahang-eanon it mga ordinaryong pumueoyo nga nagapas-an it mataas nga presyo tuga it domino effect it oil price increase sa nagapangunang baeak-eon ag serbisyo.
Dapat sigon nga suspendihon eon ro excise tax sa langis agud nga mabawasan ro gina-antus nga kalisod it maabu nga mga Filipino.
Sa oras sigon raya hay ipatuman it gobyerno, insigidang mabatyagan ro pagbawas sa presyo it kada litro it petrolyo.
Nag-apela man raya sa gobyerno nga padasigan ro pagpagguwa it P500 million nga fuel subsidy para sa mga corn farmers ag mangingisda kamana man ro P2.5 billion nga pondo para sa transportion sector sa bilog nga nasyon.
Dapat sigon nga siguraduhon it gobyerno nga makaabot ro nasambit nga bulig pinansyal sa kada kwalipikadong benepisyaryo.
