KALIBO, Aklan–Ginbalik eon it sangka barangay kagawad ro ginkaltas nga kantidad sa nabaton nga sweldo it sangka residente nga naging benepisyaryo it Tulong Panghanapbuhay sa Ating Disadvantaged/Displaced workers ukon TUPAD program ukon ro mga naduea-an it trabaho sa pagpanaesa it pandemya.
Suno kay Ronald Belinario, residente it barangay Lanipga, Tangalan nga kaina it agahon hay nag-agto sa andang baeay ro ama it andang ginareklamo nga si Kagawad Menchie Batoy.
Kaibahan sigon kara si Kagawad Danny Dado, kun sa siin ginbalik nanda ro 2,500 pesos.
Ginpahayag dugang nga nagdesisyon ro pamilya ni kagawad batoy nga ibalik ro nasambit nga kwarta agud nga owa eon it sangag ag matapos eon ro isyu.
Indi sigon makatueog ro opisyal ag nagatinangis matapos nga maeakot sa nasambit nga anomaliya.
Madumduman nga nagdangop sa Bombo Radyo Kalibo si Belinario kaibahan ro anang misis nga si Erica nga benepisyaryo it programa matapos nga gina-alegar nga ginbo-oe ro anang nabaton nga 3,950 pesos ag gintaw-an eamang it 1,500 pesos.
Gin-insister sigon ni Batoy nga pamaskwa kanda nga mga barangay official ni Cong. Teodorico “Nonong” Haresco ro nasambit nga kwarta apang ginpaagi eamang sa mga pomueuyo.
Ro nasambit nga beneficiary hay gintanyagan nga magatrabaho sa sueod it 10 adlaw ag magabaton it nasambit nga kantidad.
Raya sigon ro ikaywang kahigayunan nga nakabaton sanda it kwarta halin sa TUPAD program.
Apang ko una hay nagbaton eamang imaw it 1,000 pesos bangud nga gingamit eamang ro anang pangaean ag owa man imaw aktwal nga nagtrabaho.
