KALIBO, Aklan—Ginareklamo makarun it pilang ka mga residente sa Brgy. Sigcay, Banga ro andang nakit-an nga mga mabahoe nga buho-buho sa gintukod nga revetment wall sa nasambitan nga lugar.
Suno kay Evelyn Ibardolaza nga masyadong delikado para kanda nga naga-istar maeapit sa suba ro mga nakit-an nga maeagkong buho-buho sa revetment wall.
Dugang pa kara nga owa sanda it maayos nga tueog sa kada mag-uean bangud sa kahadlok nga matiphag ro revetment wall ag maabot it baha ro andang panimaeay.
Ginapahayag nga haeos naga-abot pa eamang it limang dag-on ro nasambitan nga proyekto apang medyo bukon sigon it matibay ro pundasyon.
Samtang, ginpaabot man sigon nanda sa andang Barangay Kapitan ro nasambitan nga concern ag natigayon nga mapatambakan it baeas apang raya hay nagaka-anod man kung may mabaskog nga baha.
Masyado eun sigon rayang delikado sa mga nagahampang nga unga ag maskin sa mga magueang nga nagapanaw kung gabie.
Bangud kara hay nagapangayo sigon sanda it bulig sa mga natugdan nga ahensiya it gobyerno para sa mas madasig nga aksiyon sa andang problema
Sa pihak nga parte, ginpahayag man ni Heide Dela Cruz, barangay secretary it nasambit nga lugar nga nataw-an eon it temporaryong solusyon ro problema it mga pomoeuyong maeapit sa suba matapos nga gintambakan raya it baeas ag ginbutangan it butong apang masyado gihapon nga delikado kung may baha.
Bangud kara hay nagaeaum sanda nga mataw-an eun it pangmabuhayan nga solusyon ro andang problema.
