KALIBO, Aklan–May posibilidad nga kapas-eawan sa paghigugma ro sambilog sa mga rason kon ham-an nga nagdesisyong magbigti ro sangka 20-anyos nga school girl sa sueod it anang kwarto sa baeay it anang amo sa Barangay Estancia, Kalibo.
Ro biktimang si alyas Jenny, grade 11 student ag residente it Barangay Rosal, Libacao hay naga-isaeahanon eamang sa baeay kat magbigti gamit ro higot it skipping rope.
Suno sa anang amo nga si alyas Wilma, owa it asawa ag sangka retired teacher nga nagpanaw sanda sa Iloilo ko Miyerkules nga adlaw agud nga magpa-renew it passport it anang apo sa gumankon.
Apang sa andang pag-uli kabi-e pasado alas-6 ro pang-orason hay nangawa sanda nga owa it may nagabukas it andang gate maskin nga makapilang beses nga nagtawag.
Nakita sa sueod it anang kwarto ro pilang bote it ilimnon ag sitsirya.
Ginpahayag dugang nga sa pag-usisa it kapulisan sa mga igmanghud it biktima, ginasugid nga nakita kara ro anang dating nobyo ko anang pag-uli sa libacao ko nagtaliwan nga mga binuean.
Ginasugid nga kon mahilong ro daeaga hay nagabalik sa anang isip ro gina-alegar nga pagloko kana it anang ex-boyfriend.
Samtang, sa pag-usisa sa cellphone it biktima, nakita ro text message kara sa anang igmanghud nga nagapa-iba sa baeay it anang amo bangud nga nakabatyag imaw it kamingaw.
Nagdesisyon man ro anang amo nga imaw ro magabayad it kabaong ag iba pang gastos sa pagpaeubong sa biktima.
