KALIBO, Aklan—Sigidas ro ginahimo nga preparasyon it Commission on Election (Comelec)-Tangalan para masiguro nga maging maayos ro daeagan it nagahilapit nga May 9 national and local elections.
Suno kay Jane Magallanes, Election Officer II it Comelec-Tangalan nga nabaton eon nanda ro mga official ballot, Vote Counting Machine (VCM) ag iba pang election paraphernalia.
Nakapatigayun eon man sigon sanda it refresher training sa tanan nga electoral board nga makaibahan sa eleksyon.
Sa Mayo 7 suno kana hay may pagahiwaton sanda nga final testing ag sealing it VCM.
Ginpasiguro pa ni Magallanes nga strikto nanda nga igapatuman ro tanan nga safety measures para indi maging super spreader event ro eleksyon eabi pa ag nagapabilin gihapon ro paeag it pandemya.
Ro Tangalan hay ginabilog it 15 ka mga barangay kung siin may una sanda nga 12 ka mga voting centers, 28 nga clustered precincts ag kapin sa 15,577 nga registered voters.
Ginapahayag nga ginapasugtan ro sambilog nga watcher it kada partido sa kada polling precinct.
Dapat sigon nga rehistradong botante it andang banwa ro watcher nga igabutang it mga kandidato.
Samtang, ginkalipay man kara nga owa it natumod nga lugar sa andang banwa nga makabig nga election hotspot.
