NATIONAL News —- Welcome para sa sangka infectious diseases expert sa mga proposal nga magbutang it mga vaccination site sa mga polling place sa May 9 elections agud nga mapataas ro COVID-19 vaccine ag booster coverage sa nasyon.
Suno kay Dr. Edsel Salvana, miyembro it DOH – Technical Advisory Group, mas kombinyente kun mabakunahan maeapit sa mga polling precinct ro mga botante, partikular ro mga wala pa it primary dose.
Raya hay agud nga mabawasan sigon ro peligrong hatud it COVID-19 eabi pa ag ginaeauman nga pagadagsaon it masobra sa 65 milyon nga botante ro nagkaeain-eain nga eskwelahan nga pagahiwatan it eleksyon.
Sa makaron hay kapin sa 67.9 milyon nga indibidwal ukon 75.45% eon it target population ro fully vaccinated kontra sa COVID-19 samtang 13.2 milyon ro naturukan eon it booster.
Nauna eon nga ginpahayag it Commission on Elections nga ro mga botanteng COVID-19 positive ukon makitaan it mga sintomas hay pagapasugtan man nga makaboto apang sa mga isolation polling places.
