KALIBO, Aklan—Matapos ro landslide victory, ginpasiguro ni Ibajay mayor Joen Miraflores nga pagapadayunon ro mga proyekto ag programa nga naumpisahan it anang ama nga si incumbent governor Florencio Miraflores.
Suno kana nga mabahoe ro anang pagpasaeamat sa owa ginaeauman nga mabahoe nga abanse kontra sa anang kaengkwentru nga si dating Kalibo mayor William Lachica sa bag-o eamang natapos nga eleksyon kun sa siin raya sigon ro kauna-unahan nga kahigayunan nga may nagdaog nga Miraflores sa banwa it Banga ag New Washington.
Utang nga kabaeaslanan man sigon nana raya sa andang mga kapartido.
Angot kara, ginpasiguro nana sa publiko nga igabalik kanda ro pagsalig nga gintugyan kana pinaagi sa pagpabaskog sa social services partikular sa mga programa angot sa ikamayad nga eawas ag iba pa.
Pagaeauman man suno kana nga maging bukas ro anang taeatapan sa tanan nga mga nagakinahangean it andang bulig mapa-pobre man ukon manggaranon.
Samtang, plano pa kara nga pabaskugon ro industriya it turismo nga owa eamang nakatutok sa Boracay kundi sa iba pang tourist spots nga makit-an sa Aklan.
