KALIBO, Aklan—Naproklamar eon it Commission on Election ukon Comelec Aklan ro mga nagdaeaog nga kandidato sa provincial level.
Nagmarka sa kasaysayan it eleksyon makaron nga dag-on ro pagdomina it grupong Tibyog Akean kon sa siin si Joen Miraflores ro bag-ong gobernador it Aklan nga nakalista it 196,897 votes ag ro presenteng bise gobernador nga si Atty. Reynaldo “Boy” Quimpo gihapon ro nagpangibabaw nga may 143,761 nga boto.
Pag-abot sa pagka-board member hay haeos anda tanan ro 5 by 5 nga unang kahigayunan sa kasaysayan it Sangguniang Panlalawigan nga sangka grupo ro magapungko sa nasambit nga pwesto.
Sa unang distrito it Aklan, proklamado eon sanday Nemesio Neron nga nakabueo it 87,724 votes; ginsundan ni Mark Quimpo nga nakalista it 87,302 nga boto; Mark Ace Bautista nga nakaangkon it 84,070 votes; Teddy Tupas nga may 57,594 nga boto ag si Apol Cleope nakabueo it 49,163 votes.
Ginkilaea eon man it Comelec Aklan sa ikaywang distrito sanday Jay Tejada nga nakalista it 97,017 votes; Lolong Dalisay nga may 81,725 nga boto; Jupiter Gallenero nga nakaangkon it 78,267 votes; Jojo Cordova nga nakalista it 73,806 votes ag Vice Larry Solidum nga nakabueo it 67,776 nga boto.
Samtang sa pagka kongresista sa unang distrito nagapabilin sa pwesto si Carlito Marquez nga nakabueo it 89,731 votes kamana man sa ikaywang distrito it probinsya hay uman nga magapungko si Teodorico Haresco nga nakalista it 134,436 votes.
