KALIBO, Aklan—“Wait and see” ro mga negosyante sa probinsiya it Aklan sa magiging epekto it gin-aprubahan nga wage increase sa Western Visayas it Regional Tripartite Wage and Productivity Board.
Sa Wage Order No. 26 para sa dugang nga sweldo it mga minimum wage workers, ro mga nagatrabaho sa non-agricultural ag commercial industries hay makabaton it dugang nga P55 kada adlaw.
Buot hambaeon nga halin sa P395 hay magiging P450 ro andang pagaswelduhon kada adlaw.
Apang sa mga maisot nga negosyo nga manaba sa 10 ro mga empleyado, kapin sa P110 pesos ro igadugang sa kada adlaw.
Sa agricultural man, P95 ro dugang sa andang minimum wage nga halin sa P315 hay magiging P410.
Apang suno kay Mr. Ramil Buncalan, board of director it Philippine Chamber of Commerce and Industry ukon PCCI-Aklan, ‘wrong timing’ ro nasambit nga desisyon.
Indi sigon raya masarangan makaron it mga kompaniya.
Haeos owa pa sigon nakakabawi ro mga negosyo bangud sa covid 19 pandemic, epekto sa ekonomiya it giyera sa tunga it Russia ag Ukraine ag iba pa.
Posible suno kana nga ma-apply ro panibag-ong wage increase sa isla it Boracay bangud sa amat-amat nga pagbalik it mga turista kamana man sa iba pang mga mabahoe nga siyudad sa region 6.
Apang sa mainland it Aklan hay medyu indi pa masarangan.
Sa pihak kara, owa sanda it mahimo kundi nga magsunod sa mandu apang, nagakabaeaka man ro PCCI-Aklan nga posible raya nga magaresulta it closure ukon pagsarado it mga kompaniya ag retrenchment ukon pagbawas it mga empleyado.
Matapos ro ginpatigayon nga review it national wages productivity commission hay gin-aprubahan raya ag nakataeanang igapatuman sa Hunyo 3.
