KALIBO, Aklan—Eubus sigon ro kalipay ag pagpasaeamat it mga Sangguniang Kabataan ukon SK officials engkaso nga insigidang maiplementar ro gin-aprubahang laye ni Pangueong Rodrigo Duterte partikular ro Republic Act No. 11768 nga naga-amyenda sa probisyon nga nakasueod sa Sanggunian Kabataan Reform Act of 2015.
Suno kay Malay SK federation chairman Christine Hope Pagsuguiron, mabahoe nga bulig sa mga miyembro kaeakip ro treasurer ag secretary ro bueanan nga honoraria.
Sa nasambit nga laye, makabaton ro mga raya it honorarium sa katapusan it kada regular monthly Sk meeting sa kondisyon nga indi mag-eampas sa 25 porsyento it pondo nga nakataeana para sa SK ag inde man mag-eampas sa compensation nga nababaton it SK chairperson.
Ginpahayag dugang ni Pagsuguiron nga engkasong maimplementar it husto ro laye hay maabo man nga proyekto ag programa ro mahimo it mga SK federation ag youth development council sa municipal level.
Mag-eowas kara, nakabaehag dugang nga pwede man magta-o ro local government units it dugang nga sweldo ag social welfare contributions ag hazard allowance sa SK chairperson ag iba pang elected ag appointed members it youth council pinaagi it mga lokal nga ordinansa.
