KALIBO, Aklan—Uman nga nagpangibabaw ro sangka manugturo sa probinsya it Aklan matapos nga mapilian bilang sambilog sa mga presenter it National Educators Academy of the Philippines.
Si Boby Rose Ricaforte, Master Teacher II it Aguinaldo T. Repeidad Sr. Integrated School (ATRSIS) ro naga-isaehanon nga manugturo sa bilog nga Western Visayas ro nakasueod sa National Educators Academy of the Philippines.
Raya hay sangka organisasyon it mga manugturo nga natao it scholarship ag programa nga nakasentro sa teachers development ag school heads development.
Ro entry nga gingamit ni Ricaforte sa pagpasakop hay ro “I RISE” ukon Reinforce, Innovate, Serve and Empower.
Eubus sigon ro anang kalipay matapos imaw nga ma-qualify bilang presenter sa pihak nga ro iba nana nga kaibahan hay mas mataas kana ro posisyon ag may bastante nga resources.
Ginpasamaeatan man kara ro anang composite team nga nagbulig kana.
Aminado si Ricaforte nga sambilog sa naging hangkat kana ro kakueangan it pondo apang owa sigon raya naging sab-eag para ipadayun ro anang handom nga makatao it kadungganan sa probinsya.
Ginpahayag dugang nga tuyo nana nga mag-aywan it manami nga legasiya sa mga estudyante ag kapareho nana nga manugturo rason nga padayun imaw sa pagtao it inspirasyon.
