KALIBO, Aklan–Emosyonal ag indi makapati ro ina it sangka 22-anyos nga soltero nga owa eon ro anang unga matapos nga bun-on sa guwa it sangka baylihan sa barangay Agbanawan, Banga ko Dominggo it aga-aga.
Suno kay Mrs. Evelyn Retoriano it barangay Sigcay, Banga nga owa nanda ginaeauman nga raya ro madangatan it anang unga nga si Rey Retoriano bangud nga bukon man raya it bayolente nga klase it tawo.
Ginpahayag nga ro anang unga hay malambing , madinumdumon ag maabu pa kunta nga handum sa kabuhi.
Sa makaron hay plano it pamilya nga indi magpa-areglo ag igapursige ro kaso kontra sa suspek nga si Melvin Rala, 28 anyos it Brgy. Polocate, Banga.
Nasayuran nga ginpaidaeum eon sa inquest proceedings sa aklan prosecutors office ro suspek sa kasong homicide.
Sa pihak nga parte, ginsaysay ni Jomary Caburnay, igkampod ag kaibahan it biktima kat matabu ro insidente nga samtang nagapa-uli eon kunta halin sa baylihan hay ginsub-eang sanda it grupo it suspek ag ginbugbog.
Makadali suno kana imaw nga nalipong bangud sa lastro sa ueo , baba ag ag iba pang parte it eawas.
Ro masunod sigon nana nga nasaksihan hay nagapaeagiw eon ro suspek ag iba pa nana nga kaibahan matapos nga natumba eon nga duguan ro anang igkampod.
Nagapabilin suno kana nga blangko sanda sa motibo it krimen bangud nga owa man it alitan nga natabu sa sueod it baylihan.
Ro biktima hay nag angkon it sangka igo it pagbuno sa anang dughan nga gintunaan it anang kamatayon samtang ginadaea sa ospital.
