KALIBO, Aklan–Makabig nga epektibo ro ginpatuman nga gun law system it Australia para mabawasan ro insidente it mass shooting sa andang nasyon.
Suno kay Bombo International Correspondent Denmark Suede it Sydney, Australia nga nagapatigayun it maidid nga pag-usisa ro andang otoridad antes nga pasugtan nga magbakae ukon magdaea it baril ro sangka indibidwal.
Raya sigon hay nakadepende kung siin pagagamiton ro armas.
Ginataw-an man suno kana it importansya it gobyerno ro mental health rason nga nagataeana sanda it mabahoe nga pondo para kara.
Nag-umpisa ro paghugut sa pagpasugot it paghupot it baril matapos ro natabo nga mass shooting ko Abril 1996 sa Port Arthur.
Kung siin, sangka Australian national ro nagbaril ag pumatay sa 35 katawo kamana man nga ginka-nina it 23 nga iba pa.
Ro nasambit nga insidente sigon ro nailistang may pinakamataas nga casualty it mass shooting sa nasyon.
Samtang, makataliwan ro 12 diyas hay nagkasugot eon ro mga state leaders nga hugtan ro pagbuyot it baril sa idaeom it pagdumaea ni Prime Minister John Howard.
