KALIBO, Aklan—Dead on arrival nga gindaea sa Aklan provincial hospital ro sangka eaeaki matapos nga maeomos sa baybayon nga sakop it Rizal Street New Washington.
Suno kay Gay Paderes, team leader it Municipal Disaster Risk Reduction Management Office ukon MDRRMO-New Washington, ginrespondehan nanda ro insidente pasado alas-5:52 it hapon kon siin ginkilaea ro biktima kay “alyas Cardo” ag ginasugid nga residente it banwa it Malinao.
Ginpahayag dugang ni Paderes nga gintinguhaan pa nanda raya nga irivive hasta nga nakaabot sa hospital apang pag-abot sigon nanda sa baeay paboengan hay gindeklara raya nga patay eon it nagtatap nga doktor.
Maabo suno kay Paderes nga tawo sa nasambit nga baybayon rason nga sa takas eon nanda naabutan ro biktima apang uwa eon natabangan pa.
