KALIBO, Aklan—Nagpangayo it public apology ro sangka motorcycle rider matapos nga nagpatigayon it “exhibition” sa sangka karsada sa banwa it Kalibo.
Suno kay Engr. Marlon Velez, hepe it Land Transportation Office ukon LTO-Aklan nga indi man nanda pwedeng maboe-an it lisensiya ag ma-tikitan ro rider bangud nga owa man nanda naaktuhan ro anang pag-exhibition.
Ro insidente hay natabu sa ginpatigayon nga charity ride-panay loop nga naglibot umpisa sa Aklan paagto sa Antique, Iloilo ag Capiz.
Madumduman nga nag-viral sa social media ro video ag litrato it nasambit nga rider nga imaw mismo ro nag-post sa anang facebook account nga nakapukaw man sa atensyon it motorcycle riders community ag ko LTO.
Matapos nga maimbitahan hay insigida man sigon nga nag-agto ro rider sa opisina it LTO-Aklan ag gin-aku ro anang pagkasaea.
Ginpahayag ni Engr. Velez nga ro gin-obra nga mga stunt it rider hay makabig nga reckless driving rason nga gin-obliga imaw nga magpaidaeum sa defensive driving agud nga masayuran ro mga dapat ag indi dapat nga obrahon kon nagamaneho sa daeanon.
Sa nasambit nga video hay makita nga nagtindog raya sa anang ginamaneho mga motorsiklo ag gin-alsa ro sambilog nga siki nga delikado sa iba pang mga motorista sa public road.
Samtang, nagaeaum si Velez nga maging “lesson learned” ro natabu.
