KALIBO, Aklan—Mabahoe ro posibilidad nga magpundo sa pagbiyahe ro pilang jeepney driver bangud sa kawad-an it kita tuga it sigidas nga pagtaas sa presyo it produktong petrolyo.
Suno kay Allan Justo, jeepney driver it Camaligan-Kalibo vice versa nga grabe eon ro andang kalisod nga ginapangatubang makaron sa pagmahae it diesel.
Ro kita sigon nanda sa sueod it sang adlaw nga pagpamasada hay haeos maigo eang sa pagpatayon it krudo ag pang remit sa operator.
Nagprangka man sigon imaw sa anang operator nga base magpundo eon lang sanda sa pagbiyahe para mag-usoy it ibang paeangitan-an.
Sa pihak nga parte, owa pa sigon nanda ginapatuman ro daywang piso nga dugang nga sukot sa pamasahe.
Raya hay sa pihak it pag-apruba it Land Transportation Franchising and Regulatory Board (LTFRB) sa hirit it mga jeepney driver nationwide.
Samtang, mas pabor sigon sanda nga panabaan eon lang it gobyerno ro presyo it langis kaysa magpataas it pamasahe kung siin ro mga commuter ro apekto.
