KALIBO, Aklan—Ginbasura it Office of the Ombudsman ro kasong Anti-Graft and Corrupt Practices Act ag Code of Conduct and Ethical Standards for Public Officials and Employees ukon pag-eabag sa Republic Act No. 7160 ukon Local Government Code of 1991 nga ginaeakutan nanday dating Governor Florencio Miraflores, reelected Vice Governor Atty. Renaldo Quimpo, mga dati ag re-elected nga miyembro it Sangguniang Panlalawigan bangud sa kakueangan it probable cause ag nagakaigo nga ebidensiya.
Ro kaso hay nag-ugat sa gina-alegar nga pag-apruba it provincial board it resolusyon ko 2018 nga nagatau it otoridad kay dating governor Joeben Miraflores nga magsueod sa loan agreement sa Development Bank of the Philippines (DBP) it kabilugan nga P1.053 billion nga may initial availment nga P153 million nga pagagamiton sa nagkaeain-eain nga infrastructure projects.
Gin-abswelto it Ombudsman ro mga akusado nga sanday Miraflores ag Quimpo, re-elected SP members Nemesio Neron ag Jay Tejada, SP member Ciriaco Feliciano it Liga ng Mga Barangay, SP member Blessie Jizmundo it Panlalawigan Pederasyon ng Samahan ng Mga Kabataan, Teddy Tupas it Philippine Councilor’s League, Aklan Chapter nga nailihir makaron bilang 19th SP member, ag dating SP members Emmanuel Soviet Russia Dela Cruz, Lillian Tirol, Ramon Gelito, Miguel Miraflores, Esel Flores ag Nelson Santamaria bangud sa kakuengan it probable cause ag nagakaigo nga ebidensiya.
Gindugang pa nga owa it natabu nga iregularidad sa nasambit nga mga opisyales sandig sa ginapatuman nga laye.
Ro kaso hay ginpasaka it mga complainant nga sanday Ignacio Yulo Dumalaog ag Victor Garcia sa alegasyon nga nag-kuntsabahan ro mga akusado sa pagpataas it kantidad nga iga-loan halin sa gin amyendahan nga kantidad nga P1.053 billion sa aktwal nga kantidad nga P153 million eamang.
Nasayuran nga ro P1.053 billion hay total credit facility nga ginkasugtanan it DBP ag provincial government it Aklan.
