Bukon eamang it ro mabahoe nga utang ro gin-aywanan it Duterte administration sa bag-ong administrasyon kundi pati ro problema sa illegal drugs.
Uwa nagmadinaeag-on si dating President Rodrigo Duterte nga solbaron ro problema sa illegal nga droga ag aminado man imaw kara.
Nagkasaea sigon imaw sa ginpromisa ko 2016 nga an-om nga buean tapos ro problema sa droga.
Apang, naka an-om nga dag-on eon imaw sa puwesto, uwa it natabo nga pagbag-o sa problema sa droga ag naglala pa.
Uwa nagmadinaeag-on ro Oplan Tokhang nga ginpatuman kato ni dating PNP chief ag makaron senador Ronald “Bato” dela Rosa.
Puro mga maisot nga drug pusher ro napatay ag pila eang ro drug lord nga naipakulong.
Maskin ro mga ginpangaeanan ni Duterte nga mabahoe nga tawo hay uwa man nana naipakulong.
Napas-eawan ro nagtaliwan nga administrasyon sa kampanya sa illegal nga droga ag ro nasambit nga problema hay ginpasa sa administrasyon ni Ferdinand Marcos Jr.
Mabahoe raya nga problema bangud sa makaron hay masyado eon nga notorious ro mga drug trafficker.
Uwa eon it ginakahadlukan.
Ginpahayag it bag-ong pungko nga DILG secretary Benhur Abalos, magasunod imaw sa drug raid para maipakita nga ro war on drugs hay sandig sa laye.
Gusto man nana nga ipataas ro morale it mga pulis nga nagapatigayon it drug operations.
Inde eon kinahang-ean nga magsunod pa sa raid si Abalos.
Ro mas manami nga obrahon hay pabaskugon ro pagtiktik sa source it droga ag kon sin-o ro utok sa likod it drug trafficking.
“Mabahoe nga isda” ro targeton.
Kon mautod ro ugat, mawad-an it source.
Samaron eagi ro mga nakumpiskang shabu para inde eon mai-recycle it mga “bugok” nga pulis.
