KALIBO, Aklan—Nagapati si Former Aklan 1st District Board member Atty. Harry Sucgang nga kinahang-ean nga tutukan it administrasyon ni Pangueong Ferdinand “Bongbong” Marcos Jr. ro food production ag healthcare system sa nasyon.
Suno kay Atty. Sucgang raya ro mga bagay nga gusto nana nga mabatian sa kauna-unahang State of the Nation Address (SONA) it pangueo sa Hulyo 25.
Nagakadapat sigon nga makaangkon it mapag-on nga solusyon ro gobyerno pag-abot sa food security eabi pa ag nakaangkon eon it kakueangan sa pagkaon kapareho it suplay it manok ag tinuean-on.
Dapat sigon nga taw-an it prayoridad kung paano mapaumwad ro food production bangud sambilog raya sa nagapangunang kinahang-eanon it mga pumueoyo.
Apisar nga indi pa mabatyagan ro grabeng epekto it krisis sa pagkaon makaron nga tyempo, mas mayad gihapon nga maging preparado ro gobyerno para sa paeaabuton.
