KALIBO, Aklan—Nagapatigayon makaron it maeapnagon nga paglimpyo ro Barangay New Buswang, Kalibo kontra dengue.
Raya ro ginpahayag ni punong barangay Arvin Santos it nasambit nga lugar matapos nga maeakip sanda sa top 3 it may pinakamataas nga kaso sa banwa it Kalibo.
Nasayuran nga base sa record it Municipal Health Office ukon MHO-Kalibo, nagapanguna sa may pinakamataas nga kaso ro barangay Poblacion, ginsundan it Andagao ag nagapangatlo ro New Buswang.
Suno kana nga ko Lunes hay ginmandu nana ro paglimpyo it andang mga drainage system.
Nag apela man imaw sa mga residente nga magkanya-kanya it paglimpyo sa andang baeay ag iba pang mga lugar nga posibleng pamugaran it namok.
Plano man ni kapitan Santos nga mag-request sa taeatapan ni Kalibo mayor Juris Sucro agud nga makapatigayon it fogging sa andang lugar partikular sa mga kasitiohan nga may nailistang mga kaso.
