KALIBO, Aklan—Nagpasa it sangka resolution ro Sangguniang Bayan it Kalibo bilang pag-oponer sa plano it Aklan Electric Cooperative (Akelco) nga magpatong it 10 percent nga surcharge sa mga electric bill nga indi mabayaran sa tamang oras.
Suno kay Kalibo SB member Ronald Marte, ginhimo nana ro nasambit nga resolution bilang Chairman it Committee on Public Utility and Energy para ipaabot ro andang hugut nga pagpamaeabag ag sentimiyento sa proposisyon it Akelco.
Ko nagtaliwan nga dominggo suno kana kat nagpatawag it sangka special session si Kalibo Vice Mayor Cynthia Dela Cruz kung siin tanan nga miyembro it konseho hay nagpirma sa resolution.
Makaeueu-oy suno kana ro mga miyembro-konsumidor nga nabudlayan sa adlaw-adlaw nga pagpangabuhi.
Dapat nga balansehon anay ro sitwasyon bangud maabu pa ro owa nakabangon halin sa epekto it pandemya kamana man nga maabu pa ro owa it trabaho.
Dugang pa ni Marte nga masyadong mabahoe ro napueong porsyento nga surcharge it Akelco kung igakumpara sa ibang kooperatiba.
Nasayuran nga gintambungan it maabu nga pumueoyo halin sa nagkaeain-eain nga sektor ro ginhiwat nga 39th Annual General Membership Assembly (AGMA) it Akelco ko Hulyo 30, 2022.
