KALIBO, Aklan—Nagpahayag it pagkadismaya ro mga Islamic believers sa probinsiya it Aklan sa ginaproponer ni Senator Robin Padilla nga same-sex marriage bill.
Suno kay Bro. Nestor Abdulkarim Bonjibod, sangka Islamic preacher sa Aklan nga makabig raya nga bawae sa Islam.
Ro andang ginakilaea eamang sigon nga kasarian hay sangka babaye ag sangka eaeaki rason nga owa nagakabagay ro pag angkon it relasyon it kaparehong babaye ag kaparehong eaeaki.
Ginakundina suno kana it katuruang Islam ro same sex marriage.
Samtang, ginapaabot sigon nanda ag ginapahisayod kay Senator Padilla bilang igmanghud nanda nga Muslim nga nadismaya sanda bangud nga mabahoe ro andang pagsalig nga imaw ro magiging saeaming it Islam sa senado.
Apang makaron hay imaw pa ro nagaduso ag nagapabor sa nasambit nga proposisyon.
Sa Islamic faith suno kana ro pagtuo ag gobyerno hay bukon it separado.
Ro gobyerno suno kana hay regulated it Divine Law of Allah.
Kon ano ro mandu ni Allah sa andang sagradong Qu-ran ukon Bibliya it mga Muslim hay indi dapat nga maamyendahan ukon mabag-o it tawo.
Madumduman nga si Senador Padilla hay sangka Muslim ukon Balik-Islam nga nagpanguna sa 2022 nga eleksyon nga may boto nga 27 million votes nga ginsuportahan it mga Muslim sa bilog nga nasyon.
