Ginapabugae it Slovakian football club nga TJ Tatran Cierny Balog nga sanda ro may pinaka-unique nga stadium sa bilog nga kalibutan bangud nga may una raya nga riles nga presenteng gina-agihan it steam engine train!
Naging tourist spot ro maisot nga banwa it Cierny Balog sa Slovakia matapos nga mag-viral ro video it steam engine train nga naga-agi sa prente it mga audience nga nagatan-aw it sangka football match.
Maabu nga mga netizens ro nagduda kun matuod baea raya edited nga video.
Nakibot ro tanan kat masayuran nga bukon it fake ro video ag matuod nga naga-agi sa sangka football stadium ro Ciernohronska Railway sa Cierny Balog Stadium.
Ginpatindog ro Cierny Balog stadium ko 1980s.
Ko rato nga tiempo, owa eon ginagamit ro riles apang nagdesisyon ro munisipalidad nga indi raya pagboe-on.
Pag-abot it dag-on 1992, uman nga ginbuksan ro Ciernohronska Railway para gamiton bilang tourist train.
Kada summer, ginapadaeagan ro vintage steamengine-powered train para magsakay it mga turista nga gustong mag-sightseeing sa Lower Tatras mountains.
Sambilog sa mga highlights it biyahe hay ro pag-agi kara sa Cierny Balog Stadium eabi eon kun may nagakatabu nga football match.
Suno sa mga travel experts, ro Cierny Balog ro nagaisaeahanon nga stadium sa bilog nga kalibutan nga may active railway track rason nga sambilog raya sa ginabutang sa sightseeing bucketlist it mga mahilig mag-travel.
